തേനി സബ് ജയിൽ ചാട്ടം: നാല് തടവുകാർ പിടിയിൽ; ബാക്കിയുള്ളവർക്കായി അതിർത്തികളിൽ വ്യാപക തെരച്ചിൽ
തേനി: തമിഴ്‌നാട്ടിലെ തേനി തെക്കമ്പട്ടി സബ് ജയിലിൽ സുരക്ഷാ ജീവനക്കാരെ ആക്രമിച്ച് രക്ഷപ്പെട്ട 17 തടവുകാരിൽ നാലുപേരെ പോലീസ് പിടികൂടി. പ്രവീൺ കുമാർ, ചിലമ്പരശൻ, രാജ്കുമാർ, രാജാ സിക്കന്ദർ എന്നിവരാണ് പിടിയിലായത്. ഒളിവിൽ പോയ മറ്റ് 13 പേർക്കായി ജില്ലയിലെ വനമേഖലകളും സംസ്ഥാന അതിർത്തികളും കേന്ദ്രീകരിച്ച് പോലീസ് ഊർജ്ജിത തെരച്ചിൽ നടത്തിവരികയാണ്.
സെല്ലിൽ ഒപ്പമുണ്ടായിരുന്ന ഒരു തടവുകാരന് അസുഖമാണെന്ന് തെറ്റിദ്ധരിപ്പിച്ചാണ് സംഘം സുരക്ഷാ ജീവനക്കാരെ ഉള്ളിലേക്ക് വിളിച്ചുവരുത്തിയത്. പരിശോധനയ്ക്കായി വാതിൽ തുറന്ന ഉദ്യോഗസ്ഥരെ തടവുകാർ സംഘം ചേർന്ന് ആക്രമിക്കുകയായിരുന്നു. ആക്രമണത്തിൽ സബ് ജയിലിലെ ഗ്രേഡ്-2 വാർഡൻ തങ്കപാണ്ടിക്ക് തലയ്ക്ക് ഗുരുതരമായി പരിക്കേറ്റു. ഇദ്ദേഹത്തെ വിദഗ്ധ ചികിത്സയ്ക്കായി സമീപത്തെ സർക്കാർ ആശുപത്രിയിൽ പ്രവേശിപ്പിച്ചു. ഡ്യൂട്ടിയിലുണ്ടായിരുന്ന മറ്റ് രണ്ട് ജീവനക്കാർക്കും സംഘർഷത്തിൽ നിസ്സാര പരിക്കേറ്റിട്ടുണ്ട്.
സംഭവത്തെ തുടർന്ന് സമീപ ജില്ലകളായ മധുര, ദിണ്ടിഗൽ എന്നിവയ്‌ക്കൊപ്പം കേരളത്തിന്റെ അതിർത്തി ജില്ലയായ ഇടുക്കിയിലും പോലീസ് അതീവ ജാഗ്രതാ നിർദേശം നൽകി. ഒളിവിൽ കഴിയുന്ന പ്രതികളുടെ വിവരങ്ങളും ചിത്രങ്ങളും അതിർത്തി ചെക്ക്പോസ്റ്റുകളിലേക്കും സമീപ പോലീസ് സ്റ്റേഷനുകളിലേക്കും കൈമാറിയിട്ടുണ്ട്.
രക്ഷപ്പെട്ടവരിൽ ഭൂരിഭാഗവും 19 മുതൽ 26 വയസ്സ് വരെ പ്രായമുള്ളവരാണ്. മധുര, ശിവഗംഗ, രാമനാഥപുരം, സേലം, കന്യാകുമാരി, തേനി തുടങ്ങിയ വിവിധ ജില്ലകളിൽ നിന്നുള്ളവരാണ് ഇവർ. സംഭവത്തിൽ കേസെടുത്ത പോലീസ് പ്രത്യേക സംഘങ്ങളായി തിരിഞ്ഞ് അന്വേഷണം വ്യാപിപ്പിച്ചിട്ടുണ്ട്.
