വോഡഫോണ്‍ ഐഡിയയുടെ കിടിലൻ അപ്‌ഡേറ്റ്! ഇനി പ്രീപെയ്ഡ് ഉപയോക്താക്കള്‍ക്കും ഡാറ്റ ഷെയര്‍ ചെയ്യാം

ഐഡിയയുടെ (Vi) പ്രീപെയ്ഡ് ഫാമിലി ഡാറ്റ ഷെയറിംഗ് ഫീച്ചർ രാജ്യത്തുടനീളം ലഭ്യമായി തുടങ്ങി. 2026 ഒക്ടോബർ 26 മുതലാണ് ഈ സേവനം പ്രാബല്യത്തില്‍ വന്നത്.

യോഗ്യരായ പ്രീപെയ്ഡ് ഉപയോക്താക്കള്‍ക്ക് Vi ആപ്പ് വഴി ഒരേസമയം 500 MB വീതം ലിങ്ക് ചെയ്ത ഫാമിലി നമ്പറുകളിലേക്ക് അയക്കാം. അയക്കുന്ന ഡാറ്റ അന്ന് രാത്രി 11:59-ഓടെ കാലാവധി തീരും. ഡാറ്റ അയക്കുന്നയാള്‍ക്ക് പ്രതിദിന, പ്രതിവാര, പ്രതിമാസ പരിധികളും ബാധകമാണ്.

ഏതൊരു യോഗ്യനായ Vi പ്രീപെയ്ഡ് ഉപയോക്താവിനും ആപ്പ് വഴി ഫാമിലി ഗ്രൂപ്പ് ഉണ്ടാക്കാം. OTP ഉപയോഗിച്ച്‌ നാല് നമ്പറുകള്‍ വരെ ഇതില്‍ ചേർത്ത് മാനേജ് ചെയ്യാം. ഗ്രൂപ്പില്‍ ചേർന്നു കഴിഞ്ഞാല്‍ 90 ദിവസത്തേക്ക് അതില്‍ നിന്ന് പുറത്തുപോകാൻ കഴിയില്ല. മറ്റ് ടെലികോം സർക്കിളുകളിലുള്ള നമ്പറുകളിലേക്കും ഡാറ്റ അയക്കാം. ഡാറ്റ അയക്കുന്നയാളുടെ പ്രധാന ബാലൻസില്‍ കുറഞ്ഞത് 600 MB വേണം. കൂടാതെ രണ്ട് നമ്പറുകള്‍ക്കും ആക്ടീവ് സർവീസ് വാലിഡിറ്റിയും ഉണ്ടായിരിക്കണം. അണ്‍ലിമിറ്റഡ് പാക്കുകള്‍ക്ക് കൊമേഴ്‌സ്യല്‍ യൂസേജ് ലിമിറ്റ് ബാധകമായിരിക്കും.

Vi പ്രീപെയ്ഡ് ഫാമിലി ഡാറ്റ ഷെയറിംഗ് എങ്ങനെ ഉപയോഗിക്കാം?

Vi ആപ്പ് തുറന്ന് ‘Family’ ഓപ്ഷനില്‍ ടാപ്പ് ചെയ്യുക. ഫാമിലി ഗ്രൂപ്പ് ഉണ്ടാക്കിയ ശേഷം OTP നല്‍കി അംഗങ്ങളെ ചേർക്കാം. തുടർന്ന് ‘Transfer Data’ തിരഞ്ഞെടുത്ത്, ഡാറ്റ ലഭിക്കേണ്ട ആളെ സെലക്‌ട് ചെയ്ത് 500 MB ട്രാൻസ്ഫർ കണ്‍ഫേം ചെയ്യുക. ഒരു ദിവസം ഒരു തവണയും, ആഴ്ചയില്‍ രണ്ട് തവണയും, മാസത്തില്‍ നാല് തവണയും മാത്രമേ ഡാറ്റ ഷെയർ ചെയ്യാനാകൂ. ഡാറ്റ ലഭിക്കുമ്പോള്‍ ഉപയോക്താവിന് SMS, ഇൻ-ആപ്പ് നോട്ടിഫിക്കേഷനുകള്‍ ലഭിക്കും. ഇതിനായി പ്രത്യേകം ചാർജുകളൊന്നും ഈടാക്കുന്നില്ല.

നിയന്ത്രണങ്ങളും വാലിഡിറ്റിയും അറിയാം

പ്രധാന ഡാറ്റാ ബാലൻസില്‍ നിന്ന് മാത്രമേ ഡാറ്റ ഷെയർ ചെയ്യാൻ സാധിക്കൂ. ആഡ്-ഓണ്‍ പാക്കുകള്‍, വീക്കെൻഡ് റോള്‍ഓവർ, ഡാറ്റ ഡി ലൈറ്റ്സ് ബാക്കപ്പ്, OTT ബോണസ് ഡാറ്റ, അണ്‍ലിമിറ്റഡ് നൈറ്റ്/ഹാഫ്-ഡേ ഓഫറുകള്‍ എന്നിവയില്‍ നിന്നുള്ള ഡാറ്റ ഷെയർ ചെയ്യാനാകില്ല. പല പാക്കുകളിലെ ഡാറ്റ ഒന്നിച്ചാക്കി അയക്കാനും കഴിയില്ല. ഏതെങ്കിലും ഒരു നമ്പറിന് ആക്ടീവ് വാലിഡിറ്റി ഇല്ലെങ്കില്‍ സേവനം ലഭിക്കില്ല. മറ്റ് സംസ്ഥാനങ്ങളിലെ നമ്പറുകളിലേക്കും ഡാറ്റ അയക്കാമെങ്കിലും, രാത്രി 11:59-ഓടെ ഈ ഡാറ്റയുടെ കാലാവധി അവസാനിക്കും

ജിയോ, എയർടെല്‍ താരതമ്യവും ഫാമിലി പ്ലാനുകളും

റിലയൻസ് ജിയോയും ഭാരതി എയർടെലും പോസ്റ്റ്‌പെയ്ഡ് ഉപയോക്താക്കള്‍ക്ക് മാത്രമേ ഫാമിലി ഡാറ്റ ഷെയറിംഗ് അനുവദിക്കുന്നുള്ളൂ. പ്രീപെയ്ഡ് പ്ലാനുകളില്‍ ഇരുവരും ഈ സൗകര്യം നല്‍കുന്നില്ല. അതിനാല്‍, വീടുകളിലെ പ്രീപെയ്ഡ് കണക്ഷനുകളില്‍ കുറഞ്ഞ തുകയുടെ സർവീസ് വാലിഡിറ്റി പ്ലാനുകള്‍ എടുത്ത ശേഷം, ആവശ്യാനുസരണം Vi ഫാമിലി ട്രാൻസ്ഫർ ഉപയോഗിക്കുന്നത് ലാഭകരമാണ്. കൂടാതെ ആപ്പ് വഴിയുള്ള റീച്ചാർജ് ഡിസ്‌കൗണ്ടുകളും പ്രയോജനപ്പെടുത്താം. ഇത് ചെലവ് കുറയ്ക്കാനും ഡാറ്റ തീരുന്ന അടിയന്തര ഘട്ടങ്ങളില്‍ എളുപ്പത്തില്‍ ഉപയോഗിക്കാനും സഹായിക്കും.